14 сәуір күні Қазақ тілі мен әдебиеті кафедрасының мұғалімі Қойшекенова Алтынгүл Тұрсынғалиевнаның бағыт беруімен 4сҚМҚ-9 тобы колледжімізде айтыскер ақын, "Сырым елі" газетінің бас редакторы Бауыржан Ширмединұлымен кездесу кешін өткізді. Шараның тақырыбы: "Әр өлеңі - бір әлем"

Бауыржан Ширмединұлымен бірге халықаралық, республикалық конкурстардың лауреаты, әнші Бекей Қанатов та келіп, қонақ болды. 

Шарада Бауыржан ағамызды түрлі қырынан аша түстік. "Жымпиты-Семей", "Жымпиты-Мәскеу" республикалық экспедицияларындағы қызықты жайттар, жаңа ақпараттар айтылды. Колледжімізге есімі берілген Алаш қозғалысының аса көрнекті қайраткері Жаһанша Досмұхамедов туралы тың деректермен таныс болдық.

Кеште ақын өлеңдері оқылып,  студенттер көкейкесті сұрақтарына жауап алды. Бауыржан Ширмединұлының сөзіне жазылып Бекей Қанатовтың орындауында жүрген әндер шырқалды.

Шара соңында 4сҚМҚ-9 тобының студенттері атынан қонақтарға сыйлықтар табыс етілді. Ақын да өз кезегінде Қазақ тілі мен әдебиеті кафедрасына өз ризашылығын білдіріп, Алашорда үкіметінің Батыс бөлімшесінің 100 жылдығына арнап шығарылған"Алаш аманаты" атты жинақты сыйға тартты.