16 ақпан күні колледж қабырғасында технология және бейнелеу кафедрасында көп жыл қызмет жасаған ардагер ұстаз Зеленцов Виктор Викторовичтің 85 жасқа толуына орай кездесу кеші ұйымдастырылды. Колледждің 2-қабатында мерейтой иесін шақырылған қонақтар, оқытушылар, студенттер қошеметпен қарсы алды. Колледж директоры Кайрлиева Алтынгүл Жақсығұлқызы мерейтой иесін құттықтап, гүл шоғын ұсынды. Шара әрмен қарай колледждің акт залында жалғасты.

Шараға Виктор Викторовичтің шәкірттері НЗМ ДББҰ ПШО аға менеджері, техника ғылымдарының магистрі Катаев Ердан Советұлы, Катаев Ержан Советұлы, Ермаков Юрий Николаевич, колледж ардагерлері Сүлейменов Максот Насекенұлы, Маденова Тамара Өтегенқызы, №20 ЖОББМ директорының тәрбие ісі жөніндегі орынбасары Мендыгалиева Жансая Манасовна, физика пәні мұғалімі Пак Марина Николаевна, технология пәні мұғалімі Сухова Галина Александровна, сонымен қатар ұстаздың колледж бітірген шәкірттері Лопухина Ольга Леонидовна, Оразбекова Айгуль Сапаргалиевна, Гайнуллина Елена Алексеевна және колледж оқытушылары, студенттер қатысты.

Виктор Викторовичтің әріптестері, мектептегі, колледждегі шәкірттері ұстаз жөнінде естеліктерімен бөлісті. Катаев Ердан Советұлы, Катаев Ержан Советұлы, Ермаков Юрий Николаевич ұстаздарынан тек қана білім алып қана қоймай спортқа да баулығанын жеткізді. Спорттың хоккей, футбол түрлерінен жаттықтырып, үлкен жарыстарда жүлделі орындар иемденген.

Колледж ардагерлері Сулейменов Максот Насекенұлы, Маденова Тамара Өтегенқызы Виктор Викторовичтің колледжде жасаған қызметіне тоқталды. 1982 – 2009 жылдар аралығында қызмет жасап, бастауыш сынып және технология пәні мұғалімдерін дайындауға үлкен үлес қосты. Ұстаздық жолында аянбай еңбек етіп, болашақ мамандардың сапалы білім алуына бар күшін арнады. Қандай қызметте болмасын үлкен жауапкершілікпен атқарды. Колледж директорының оқу – өндірістік жұмысы жөніндегі орынбасары Мұқашев Мұхамбет Сұпығалиұлы Виктор Викторвичтің өз ісінің шебері, әдіскер – ұстаз екенін айта отырып, жылы лебізін білдірді.

Шәкірттері Виктор Виктровичтен үлкен тәлім – тәрбие алып, қазіргі таңда табысты еңбек етіп жатқандықтарын жеткізді.