06.2022 күні Ж.Досмұхамедов атындағы жоғары педагогикалық колледжінің практика бөлімінің ұйымдастыруымен қалалық орталық демалыс саябағында "Дарынды жас, бізге қосыл!" тақырыбында шара өтті. Шараның негізгі мақсаты колледж жұмысын насихаттау, шығармашыл, белсенді студенттерді қолдау, педагогикалық мамандықтарды таныстырып, жаңа оқу жылына  дарынды талапкерлерді тарту болды.   

Шараға қазақ тілі мен әдебиеті, музыкалық білім беру, мектепке дейінгі тәрбие және көркем еңбек кафедраларының оқытушылары мен студенттері белсенді қатысты. Шара барысында музыкалық білім беру кафедрасы студенттері мен оқытушыларының шығармашылығы шараның негізгі арқауы болып, күй тартылып, би биленіп,  көңілді ән шырқалды.

Мектепке дейінгі тәрбие кафедрасының оқытушылары аниматорлар ролінде саябаққа келген ата-аналар мен балаларға ойын ойнатып, жерге сурет салу, түрлі дайын силуэттерді түрлі -түсті бояулармен бояу байқауларын ұйымдастырып, өздері дайындаған сыйлықтармен марапаттады. Сонымен қатар қазақ тілі мен әдебиет мамандығының студенттері белгілі  ақындардың өлеңдерін нақышына келтіріп, мәнерлі оқып, саябақ демалушыларына рухани азық сыйлады. Көркем еңбек кафедрасы студенттерінің шығармашылық жұмыстарынан ұйымдастырылған көрмеге саябақ демалушылары үлкен қызығушылық танытып, кафедра студенттерінің пленэрде орындаған жұмыстарын тамашалады.

Колледж дарынды, шығармашыл, өнерлі  талапкерлерді өз қатарында болуға шақырады!