01.02.2024 Жаһанша колледжінде Қазақ тілі мен әдебиеті кафедрасының жанынан жұмыс жасайтын «Дарын» әдеби-өнер клубының ұйымдастыруымен «Өзбекәлі және мәдени майдан» кітабының таныстырылымы болып өтті. Тағылымды шараға «Отбасы хрестоматиясы» сериясымен шыққан құнды кітаптардың өңіріміздегі негізгі насихатшысы «Зерек» оқу орталығының жетекшісі Манарбек Жұмабай мен орталықтың оқытушысы Нұрилә Ертайқызы қонақ ретінде шақырылып, колледж ұжымы мен студенттер қауымы қатысты.

Шара шылбырын қолына алған «Дарын» клубының жетекшісі Жандос Жанұзақұлы жиналған қауымды құрметті қонақтармен және бүгінгі басқосудың басты мақсатымен таныстырып, сөз тізгінін Манарбек Сайынұлына табыстады. Сөз тізгінін қолына алған қонағымыз туындының жазылу тарихынан бастап, автор Санжар Керімбайдың кітаптың басты кейіпкер-Өзбекәлі Жәнібек жайлы маңызды мәліметтерді қалай жинақтағанына толық тоқталып өтті. Кейіннен кітап кейіпкері Өзбекәлі Жәнібектің кісілік келбетін, болмыс бітімін, азаматтық тұлғасын, хас қайраткерлігін, ұлт жанашыры екенін танытатын ерен еңбегі мен өрен ерлігіне кеңінен тоқталып, оның Алаш арыстарын ақтау, Қожа Ахмет Иассауи кесенесін қайтадан қалпына келтіру, Ресейден тайқазанды қайтару мен тыйым салынған наурыз мейрамын тойлауға жол ашқан жанкештілігін жеке-жеке атап өтті.

Кездесуге шақырылған колледж шәкірттеріне Өзбекәлінің өнегеге толы өрен ерлігі мен ерен еңбегі өте қатты әсер етті. Шара соңында директордың тәрбие жұмыстары жөніндегі орынбасары Бақытханым Мақсотқызы келген қонақтарға риясыз ризашылығын жеткізіп, «Зерек» оқу орталығына директордың атынан алғысхат тарту етті.