ВЫСШИЙ ПЕДАГОГИЧЕСКИЙ КОЛЛЕДЖ

    ИМЕНИ Ж. ДОСМУХАМЕДОВА

    "Жырымен әлдилеген Ақжайығын" атты жыр кеші

    Ж.Досмұхамедов атындағы жоғары педагогикалық колледжде Ақұштап ақын шығармашылығын ұлықтау мақсатында "Жырымен әлдилеген Ақжайығын" атты жыр кеші өтті.

    Халықаралық "Алаш" әдеби сыйлығының, "Құрмет" орденінің, Мемлекеттік сыйлықтың иегері, ҚР еңбек сіңірген қайраткері, ақын Ақұштап Бақтыгерейқызымен кездесуге колледж оқытушылары, студенттерімен қатар ақынның ізін басып келе жатқан інілері ақын Ғайса Ғали Сейтақ, облыстық "Орал өңірі" газетінің редакторы Б.Ғұбайдуллин, Жайық -Пресс медиа холдингінің директоры Р.Сәбитов, әнші-композитор Қ.Қисметов, шәкірті Г.Абдуловалар қатысып, ақын шығармашылығы туралы ой-пікірлерін білдірді. Кеш барысында Ақұштап ақын өз оқырмандарымен өмірден көрген -түйгендерімен бөлісіп, аналық ақ тілегін жыр жолдарымен жеткізді. Жыр сүйер қауым ақынның Жайықтың Ақ Шағаласынан Алаштың Ақұштабы дәрежесіне дейінгі өсу жолын оның өлеңдері арқылы таныды, түйсінді. Ақынның өзім туралы өлеңдер циклін, лирикалық өлеңдері мен өршіл рухты жырларын студенттер мөлдіретіп мәнерлеп оқу арқылы тыңдарманға Отанға деген махаббат туған жерге деген адал сезімнен басталатынын ұғындырғандай болды. Ақұштап Бақтыгерейқызының қазақтың біртуар тұлғалары Жұбан ақын, Қадыр ақын, Хамза Есенжанов, өр мінезді батыр қыз Мәншүк пен ақын Фариза рухтарына арналған арнау өлеңдерінен тұлғаны таныту миссиясын аңғарды. Ақынның орыс тіліне аударылған "Лебединая верность" (Т.Кузовлева) жыр жинағынан оқылған өлеңдерінің де ақын табиғатының өзге тілге таза берілгенін байқады. RED x жобасы аясында автордың колледждегі ақын атындағы дәрісханаға өз қолтаңбасымен тапсырған жыр жинақтарының жарнамасы жасалып, қалың оқырманның жыр оқуға деген құлшынысын арттырды.
    Ақынның әнге айналуы да - бір бақыт, оның өлеңдеріне Шәмші Қалдаяқовтан бастап ән жазған. Кеш барысында ақын сөзіне жазылған І.Жақановтың "Оралдың ерке самалы", Қ.Қисметовтің "Алаштың Ақұштабы" атты сөзі мен сазы қабысқан әндері орындалып, тыңдарман қауымды ерекше күйге бөледі. Кеш соңында оқылған Ақұштап Бақтыгерейқызының Жайық туралы жүрекке жазылған жырыннан тыңдарман мерейтой үстінде де ақын көңілінде алаң барын танып, "Депутатыңмын қашаннан, дауыссыз, даусыз сайланған" деген жолдардың мәнін терең сезінді, ақын жырларының жүректерге жетуінің сыры жүректе жазылатындығын ұқты, сөйтіп талантқа тағы бір бас иіп, Ақжайығын жырымен тербей беруге сарқылмас шабыт, мықты денсаулық тіледі.
    Қазақ тілі әдебиеті мамандығының 2-курс студенті жас ақын Әлібекұлы Ақтілек Ақұштап Бақтыгерейқызына балғын жүрегінен жыр арнады.

    Бізге керек марапат пен сый несін?!
    Бізге бақыт!
    Шабыт деген күй кешу.
    Сен-өлеңдей,өлең-сендей аппақ қой,
    Беу,не деген үйлесім!

    Байқамасақ жанымызда сыншы тұр,
    Ондайларға қолды сілтеп,бір түкір.
    Қара ниет көңіл басқан заманда,
    Аппақ әжем,өзің барсың мың шүкір!

    Көбейгенде қалайтындар пұлды аса,
    Сен оларға мән берме әже, мың жаса.
    Атырауға келін болған жақсы адам,
    (Бақыт шығар)
    Атыраулық жігіттен жыр тыңдаса.

    Жаспын әлі,
    Менде де арман сан алуан,
    Қолға қалам ұстап жүрмін адалдан.
    Қаракөздер жолға шықпай, тән сатпай,
    Сіздің жолмен жүрсе, шіркін, жоқ арман!

    Ертеңді ойлап мүжілем де кетілем,
    Көңіл қалып суық сөздің өтінен.
    Бұрын өліп, арын сатпай қазақ қыз,
    Бұрым өріп кетсе бәрі шетінен...

    Өлең еді өлуіме араша,
    Соны тыңдап қуандың ба балаша?!
    Сіздің жырды жаттап алып әпкелер,
    Шет елдікке асқақ түрмен қараса...
    Жағу қиын өшіп қалған шырпыны,
    Бұл да өмір заңдарының бір түрі.
    Сіздің жеңіс һәм қазақтың жеңісі,
    Осы армандар орындалса бір күні!

    Аппақ әжем!
    Жырыңда мән сан алуан,
    Себебі сен аттамадың ақ Ардан.
    Атырауға келін етем ақ әжем,
    Дәл сіздей қыз тауып алып Оралдан!
    Менде басқа жоқ арман!